കാത്തിരിക്കുന്നു...

ഞാൻ ഓർത്തു..
വിറയാർന്ന കൈകളാൽ വിളമ്പിത്തന്നതും,
ചുളിവുള്ള ചുണ്ടാൽ ചുംബിച്ചതും..

നിന്റെ കൈകളെനിക്കു താങ്ങായതും,
നിന്റെ കണ്ണുകളെനിക്കു കാഴ്ചയായതും,
നിന്റെ നാവെന്റെ വാക്കായതും,
എന്റെ ദുശ്ശാഠ്യങ്ങൾക്കു നീയുത്തരമായതും..

എന്റെ മറവിയുടെ ജാലകമടച്ചതും നീ,
വരണ്ടു തുടങ്ങിയ ഓർമ്മച്ചെപ്പിൽ
ഓർമ്മകൾ നിറച്ചതും നീ..

കടംങ്കഥ പറഞ്ഞ്‌ ഏകാന്തതയെ തോൽപ്പിച്ചതും,
കടൽ തിരകളിൽ എന്നെ നയിച്ചതും,
കായൽ കാറ്റെന്നെ കൊള്ളിച്ചതും..

എന്റെ നിദ്രയിലേക്കെന്നും നീ കൂട്ട്‌ വന്നു,
നീ കരുതി വെച്ചു, കൈയെത്തും ദൂരത്ത്‌,
എന്നും എനിക്കുള്ള ദാഹജലം..

ഒടുവിൽ ഞാനുറങ്ങിയപ്പോൾ,
നിന്റെ കണ്ണു നിറഞ്ഞതു ഞാൻ കണ്ടു..
അപ്പോൾ എനിക്ക്‌,
നിനക്കില്ലാത്ത കാഴ്ച്ചയുണ്ടായിരുന്നു!
കണ്ണടച്ചാലും കാണാവുന്ന കാഴ്ച്ച.

ഇവിടെയൊറ്റയ്ക്ക്‌ ഞാൻ കാത്തിരിക്കുന്നു,
എന്റെ ഓർമ്മച്ചെപ്പിൽ നീ നിറച്ച ഓർമ്മകളുമായി..
നിന്റെ ചുളിവാർന്ന ചുണ്ടുകളും,
അവിടെ വിരിയുന്ന നിന്റെ ചിരിയും..

കാത്തിരിക്കുന്നു ഞാൻ നിനക്കായി..
ഇവിടെ..ഈ മേഘങ്ങൾക്കിടയിൽ..

14,544

Post a Comment